أصدرت وزارتا الكهرباء والبترول بيانا مشتركا، نشر على الصفحة الرسمية لوزارة البترول على موقع فيسبوك، أعلنت فيه استمرار تمديد فترة تخفيف الأحمال ساعة إضافية حتى نهاية الأسبوع.

وكانت الوزارتان أعلنتا في بيان سابق صدر أول أمس، عن تمديد فترة تخفيف الأحمال ساعة إضافية لمدة يومين فقط.

وجاءت صرخات من أولياء أمور الثانوية العامة والطلاب على هذا قرار، وطالبوا بوقف قرار تخفيف أحمال الكهرباء لحين الانتهاء من امتحانات الثانوية العامة رفقا بالطلبة بالأخص في ظل هذا الطقس الحار.

شكاوى أولياء الأمور والطلاب من القرار  

قالت ابتسام سامي، أحد أولياء الأمور: أنا أم لتؤام في الثانوية العامة يعني ايه ولادنا كل يوم ميعرفوش يذاكرو من قطع النور لأن مافيش نت يذاكرو عليه و طبعا حر وزهق لأن الجو نار”

وتابعت: “يعني لا مذاكره ولا راحه هي ديه بلدنا اللي بتوفر لولادنا الراحة والأمان هو ده مستقبل ولدنا اللي كل شويه تهدوه بدل ما نقف جمبهم وتساعدوهم، احنا مش طالبين توفر لهم سبل المواصلات اللي على ما الطالب يروح الامتحان تكون طلعت عينه من الوقفه مستني مواصلات قولنا ماشي انزلو الفجر علشان تلحقو انتو لسه شباب اتعبو شويه، على حد وصفها.

وتساءلت: “ليه 3 ساعات الصبح وكمان زيهم باليل أحنا بنموت في الحر أحنا مش في الشتاء والله حرام اللي بيحصل فينا وفي ولادنا ده وليه الطبقة المتوسطة، واللي تحت الصفر اللي بيحصل فيها كده بس ليه النور مبيتقطعش في التجمع الخامس أو شرم أو الساحل هو ناس وناس من فضلكم يا مسؤليين ارحموا شعب مصر الغلبان وحسبي الله ونعم الوكيل”.

واستكملت ندى أحمد، قائلة: “يعني وقفوا قطع النور في امتحانات النقل الترم الأول و جايين تعملوا كده في امتحانات الثانويه العامه !!! “.

وتابعت قائلة: “هو حد هيجي يذاكر مكانا ياريت نراعي بقى علشان الواحد جاب آخره مش هم امتحانات وهم ضياع وقت وعطلة.. ده اسمه هزار ده في مستقبل ناس.. أنا طول عمري داعمه للبلد في كل شئ لكن اللي بيحصل ده تهريج ومش مقبول”.

كما قالت جينا ثابت:  “ياريت المسؤول اللي بيقطع النور يبقي عارف احنا في فترة امتحانات الثانويه العامه والطلبه بتذاكر ياريت مواعيد قطع النور يكون فيها رحمه”

وأكملت: “3 ساعات ورا بعض كتير اتقو الله فينا قسموها في اليوم حتي نعرف نشحن ونزاكر علي الكشافات ساعه نص الليل وساعه الفجر كدا مش 3 ورا يعض نبقي مشلولين لا عارفين نزاكر ولا أي حاجه ارحمونا”.