بيع.
بيع يا معلم بيع...
واقفل ع المواضيع...
واقلب مصر لجثة...
تتقطع تقطيع...
بعي بلدك وأملها...
واتهنى بأموالها...
وزع مصر بحالها...
على شلة مقاطيع...
بيع يا معلم بيع...
بيع للغُرب بلادك...
وانصب فيها مزادك...
واجري وقول لسيادك...
أنا سامع ومطيع...
بيع يا معلم بيع...
بيع يا معلم واتلف...
واوعد شعبك واخلف...
والإعلام راح يحلف...
إن شتاها ربيع!!!...
بيع يا معلم بيع...
بيع وازرع أشواك...
ازرع هنا وهناك...
وإحنا بنمشي وراك...
علشان إحنا قطيع...
بيع يا معلم بيع...
عند كبير الأمة...
مجلس شعب هلمة...
هو يعك وهما...
هايحطوا التشريع...
بيع يا معلم بيع...
بيعها يا توحة ودوس...
تلتل منها فلوس...
بعها ووطي وبوس...
رجلين الدفيع...
بيع مش فارقة معانا...
مش بدأت بخيانة؟...
كمل. ما إحنا قفانا...
وارم م الطرقيع...
بيع يا معلم بيع...
وبلدنا المحنية...
رجعت زي ما هي...
هو دا عيب أغنية...
ولا دا عيب سَمّيع!!!...
بيع يا معلم بيع...
بعها وبعنا معاها...
ما إحنا في زمن العاهة...
وأما بتبقى متاهة...
لازم كله يضيع...
بيع يا معلم بيع